“ശാസ്ത്രചിന്തയും ഭാവനയും ഒരേ സമയം യാത്രചെയ്യുന്നത്, മലയാളത്തില്‍ അപൂര്‍വമായ അനുഭവമാണ്. നാളെ എന്തായിത്തീരും ഈ സാങ്കേതിക ലോകം എന്ന സ്വപ്നാന്വേഷണമാണ് ‘അസമയം’. കാലത്തിനു മുമ്പേ സഞ്ചരിക്കുന്ന ഈ ഭാവനാ പുസ്തകത്തെ മുന്നോട്ടുകൊണ്ടുപോകുന്ന കഥയും കഥാപാത്രങ്ങളും മലയാളി ഭാവുകത്വത്തിന് തീര്‍ത്തും അപൂര്‍വമായ ഒന്നാണ്. ഭാവിയില്‍ സംഭവിക്കാനിരിക്കുന്ന ഒരു ലോകം വായനക്കാരന്റെ ഉദ്വേഗങ്ങളെ അമ്പരപ്പിച്ച് മുന്നേറുന്നു, ഈ സയന്‍സ് ഫിക്‌ഷനില്‍. ”
അജ്ഞാതമായ വഴികളിലൂടെ, അറിയാത്ത നിറങ്ങള്‍ തേടി അനന്തതയിലേക്കു കുതിക്കുന്ന മനസ്സുകള്‍. എങ്ങോ വഴി തെറ്റിയ യാത്രക്കാര്‍ എന്ന് നമുക്കവരെ വിളിക്കാമോ? മനസ്സിന്റെ എത്രയെത്രയോ ബലഹീനമായ ഈ മുള്‍വേലിപ്പടര്‍പ്പിനുള്ളില്‍ മാന്‍കുട്ടികള്‍ മാത്രമല്ല. ചെന്നായ്ക്കളുമുണ്ട്. പൂതലിച്ചു പോകുന്ന വികാരങ്ങളുടെ ദൈന്യമുഖങ്ങള്‍ ഏറ്റവും ഒടുവിലാണ്‌ തങ്ങള്‍ സഹയാത്രികരാണെന്നു തിരിച്ചറിയുന്നത്. ദാര്‍ശനികമാനമുള്ള ഈ പരമാര്‍ഥത്തെ ആവിഷ്കരിക്കുകയാണ്‌ അനുഗ്രഹീതനായ ഹബീസി ആരോ എവിടെയോ, സഹയാത്രികര്‍ എന്നീ ലഘുനോവലുകളിലൂടെ.
